حكي

2009/06/12

جلس مع ابو اصطيف على رصيف الشارع يدردشون

– عم يقولوا انو السيارات الأمريكي بدها تصير بتراب المصاري .. بيع اللي عندك واشتري امريكي

– والله يا ابو صطيف طالعة اشاعة قوية كتير والكل عم يحكي فيها انو في زلزال قريب بدو يضربنا بقى بنصحك تأجل مشروعك شوي

– في حكي قوي كتير انو الدخان رح ينقطع مشان ينفقد بالسوق ويغلى سعرو لذلك اشتريلك كم كروز مونة

– الحكي مسرب من ناس فوق .. الخدامات الاندنوسيات معهن ايدز … جيبلك فلبينية

– وصلني ايميل بيقول انو احذف المسنجر من عندك لانو فيو سمايليات يهودية ونجمة داوود لذلك بنصحك ترجع تربي كشة الحمام ع السطح لنرجع نتواصل

تكسي

2009/06/10

https://i2.wp.com/wwwdelivery.superstock.com/WI/223/1558/PreviewComp/SuperStock_1558-26936.jpg

ما أن اشارت بإصبعها الصغير الرقيق حتى توقف فجأة بمكانه … صعد إلى التكسي

– بس معلش يا معلم ! منين طلعتلي انت ؟! … أنا وقفت للصبية مو إلك !
– لأ هي الصبية أنا مشغلها عندي خبيرة توقيف تكاسي .. خدني ع العزيزية

https://i2.wp.com/www.aawsat.com/2007/10/15/images/economy1.441372.jpg

اما غداً اعزائي المشاهدين فيكون الوجه بارداً والجيب فارغاً والدعم غائباً وترتفع الأسعار في ساعات النهار وتزداد الفرص لتكوم الشباب على الطرقات مع بعض الديون المتفرقة وإليكم الآن الدرجات الصغرى والكبرى

الخبز السياحي 30 – 35 البيض 125 – 140 اللبن 75 – 90  لحم الغنم 550 – 625 ….

برقت عيناها وغرغرت دمعة فيهما تطلب منه الرحمة وإبعاد ذاك المسدس عن رأسها فقال :

– انتي واحدة ( مَرَه) ( ناقصة عقل ودين ) و ( مخلوقة من ضلع أعوج ) و ( كيدك عظيم ) و اسمك ( حريم ) و ( همك للممات ) و ( موتك من المكرمات ) و ( إن ماتت اختك إنستر عرضك ) و ( البنيه بَليّه ) و ( دلع البنات يخزيك ) و ( ماتت بنته من صفاوة نيته ) و ( البنت الحلوه نص مصيبه ) و ( شاوروهن وخالفوهن ) و ( لو طلعت ع المريخ آخرتها للطبيخ ) و ( جوزها وإتريح من بَلاها )

كل هذا وتريدين مني أن اسامحك وارحمك

مصيف للسياحة والسفر يذكر زبائنه الكرام بأشهر و أرخص الرحلات الصيفية المحلية والمتوفرة للجميع

رحلة الفرنلق  ( ام الميتين ليره )
رحلة تشمل التنزه وسط ما كان يعرف بغابات الفرنلق والشواء وسط القمامة و اكياس البلاستيك .. الهواء النقي الممزوج برائحة عوادم باصات المازوت

رحلة المغارات ( بمية وخمسين ما عدا البنزين )
رحلة تتلخص في البحث عن مكان يصلح للجلوس لمدة ساعتين .. ثم افتراش التراب بجانب الشارع وشفط الاركيلة مع ارتداء الشحاطة الرجالية

رحلة البحر ( بتنط الألف ليره )
رحلة على الشاطئ الصخري المليئ بالحصى والرمل الأسود … السباحة بالملابس الداخلية بالنسبة للرجال والبيجامات الرجالية بالنسبة للسيدات .. الدوش من البحر مباشرة

عزيزي المصيف .. جميع الرحلات بدون موعد مسبق او حجز عملاً بقاعدة ( اللي بيسبق بياكل بندق ) .. لا تنسى أن تساهم بدورك في زيادة التلوث وتلحش جميع مخلفاتك في المكان

مع اطيب الامنيات بصيف جميل
مكتب مصيف للسياحة والسفر

%d مدونون معجبون بهذه: